ბესტსელერ „ჰარი პოტერის" ავტორი, ჯოან როულინგი, პროდიუსერი და პიესის თანაავტორი ხდება. ხსენებული პიესა ჰარი პოტერის ბავშვობაზე, ჰოგვარტსში გამგზავრებამდე მისი ცხოვრების შესახებ მოგვითხრობს.

შედეგად მაყურებელი მოისმენს იმ ისტორიას, რომელიც პირველ წიგნში „ჰარი პოტერი და ფილოსოფიური ქვა" არ მოხვდა.

პროექტს, რომელიც ახალგაზრდა ჯადოქრის ადრეულ წლებზე მოგვითხრობს, ჯოან როულინგთან ერთად თეატრის ცნობილი პორდიუსერები, სონია ფრტიდმანი და კოლინ კალენდერი უხელმძღვანელებენ.

„წლების განმავლობაში ვიღებდი ჰარი პოტერის ისტორიის თეატრის სცენაზე გატანის შემოთავაზებებს. მაგრამ მხოლოდ სონისა და კოლინის იდეამ დამარწმუნა, რომ ეს უნდა გავაკეთო. სიუჟეტის მათებური ხედვა ძალიან მგრძნობიარეა, გაჯერებულია პირადი განცდებითა და დაძაბულობით. ეს ყველაფერი კი აუცილებელია იმისთვის, რომ ჰარი პოტერის ისტორია სცენაზე დაიდგას" – აცხადებს როულინგი.

შეგახსენებთ, რომ ჯოან როულინგის 7 წიგნი ჰარი პოტერის შესახებ, მსოფლიოში 450 მლნ ეგზემპლარად გაიყიდა და ნათარგმნია 77 ენაზე. შვიდი წიგნი ეკრანზე რვა ფილმად გადაიღეს. მათში მთავარ როლს დენიელ რედკლიფი ასრულებს.