ბათუმში, ურეხის დასახლებაში, ერთ-ერთ საცხოვრებელ სახლზე რამდენიმე დღეა, უჩვეულო შემთხვევა ხდება: უხილავი არსება სახლს ქვებს დღისით და ღამით უშენს. სახლის მიმდებარე ტერიტორიას 24-საათიან რეჟიმში ურეხის პოლიციის თანამშრომლები სპეციალურად გაწვრთნილ ძაღლებთან ერთად იცავენ, თუმცა რაიმე კვალს ვერ მიაგნეს. უცნაური შემთხვევა პოლიციელთა თანდასწრებითაც ხდება. სამართალდამცველები პირად საუბარში ჰყვებიან, რომ ხედავენ ქვების სახლის სახურავსა და ეზოს მიმდებარე ტერიტორიაზე ცვენას, თუმცა სროლის ტრაექტორიას ვერ ადგენენ.
სახურავზე დაცემული ქვები, სხვა ქვებისგან განსხვავებით, ძირს არ ცვივა. გავრცელებული ინფორმაციით, ქვებს ექსპერტიზა ჩაუტარდა და მათი არამიწიერი წარმომავლობა დადგინდა. ამ ფაქტს ძალოვანი უწყების წარმომადგენლები არ ადასტურებენ.
